मुलीच्या लग्नाच्या पत्रिके सोबत एक केशर आंब्याचे झाड

एक हजार झाडे वाटण्याचा विश्वनाथ तोडकर यांचा संकल्प
कळंब – घरात मुलगी जन्माला आली की, तिच्या लग्नाची चर्चा होत असते.लग्न जमले की मात्र घरात पत्रिका कशी असावी याची चर्चा होते, पूर्वी मूळ पत्रिका असायची, महिना पंधरा दिवस अगोदरच घरातील एक सदस्य पत्रिका घेवून फिरत असे, पण बदलत्या काळात सोशल मीडियामुळे व्हॉट्स ॲपवर पत्रिका टाकायची व फोन करून आमंत्रण द्यायचे, त्या मुळे खर्च वाचू लागला.पण लग्नात भरमसाठ खर्च करण्याची पद्धत मात्र कमी होताना दिसतं नाही, उलट लग्न म्हणजे प्रतिष्ठा होऊन बसली आहे.लग्नात हि सामाजिक भान असावे, काही वेगळे पण असावे असे काही बोटावर मोजण्याइतकी च मंडळींना वाटते..त्यातिलच येथील
पर्याय संस्थेचे कार्यवाह, सामाजिक कार्यकर्ते विश्वनाथ अण्णा तोडकर यांनी मुलीच्या लग्नाच्या पत्रिकेसोबत एक हजार केशर आंब्याचे वाटप सुरू केले आहे. या विवाह सोहळ्यात सर्व धर्माच्या धर्मगुरूंचे पूजन करून त्यांचा सन्मान करण्यात येणार आहे. या विवाह सोहळ्याच्या पत्रिकेला,” सर्वधर्म सन्मान विवाह सोहळा” असे नाव देऊन एक आगळा वेगळा विवाह करण्याचा मानस त्यांचा आहे.
पर्याय संस्था व लोकविकास मंच चे कार्यवाह सामाजिक कार्यकर्ते विश्वनाथ तोडकर यांची मुलगी डॉ. हर्षदा व चि. अक्षय पटकुरे यांचा विवाह दोन मे रोजी सायंकाळी पर्याय संस्था येथे ठेवण्यात आला आहे.
या विवाह सोहळ्याच्या पत्रिकेसोबत प्रत्येकाला एक केशर आंब्याचे रोपटे भेट म्हणून दिले जात आहे. सर्व धर्मांचा सन्मान व्हावा यासाठी हिंदू, मुस्लिम, शीख, ख्रिश्चन, जैन, लिंगायत, या धर्मांचे गुरुवर्य उपस्थित राहून त्यांचा सन्मान करून त्यांच्या आशीर्वाद घेण्यात येणार आहेत. विवाह सोहळ्यात महापूरूषांच्या प्रतिमेचे व भारतीय संविधानाचे पूजन व शेवटी राष्ट्रगीत होणार आहे प्रसिद्ध गायक सारेगम फेम ज्ञानेश्वर मेश्राम यांच्या मराठमोळ्या गायनांचा कार्यक्रम होणार आहे.
नातेवाईक, मित्रमंडळी यांना पत्रिकेसोबत केशर आंब्याची झाड देवून, निसर्गाचा समतोल राखण्यासाठी प्रयत्न केले जात असून, प्रत्येकानी हे झाड लावावे ,अशी विनंती विश्वनाथ तोडकर सौ. अनिता तोडकर हे करत आहेत.
हा विवाह सोहळा सामाजिक भान ठेवून करण्यात येणार असून , आलेल्या पाहुण्यांचे हि रोपटे देवून सन्मान करण्यात येणार असल्याचे विश्वनाथ तोडकर यांनी सांगितले.