शिष्यवृत्तीचे अर्ज मंजुरीसाठी तात्काळ सादर करा;महाविद्यालयांना समाज कल्याण विभागाचे आवाहन

धाराशिव (जिमाका) – सामाजिक न्याय व विशेष सहाय्य विभागांतर्गत देण्यात येणान्या भारत सरकार शिष्यवृत्ती,शिक्षण शुल्क व परिक्षा शुल्क प्रतिपुर्ती,राजर्षी शाहू महाराज गुणवत्ता शिष्यवृत्ती व व्यावसायिक पाठ्यक्रमात शिक्षण घेत असलेल्या विद्यार्थ्यांना निर्वाह भत्ता इत्यादी योजनेचे सन २०२४-२५ या शैक्षणिक वर्षातील अर्ज भरण्याकरिता http://mahadbtmahit.gov.in हे संकेतस्थळ २५ जुलै २०२४ पासून सुरू केले आहे.
सन २०२४-२५ करिता बहुतांश विद्यार्थ्यांनी महाडीबीटी प्रणालीवर अर्ज भरले आहेत व ते अर्ज महाविद्यालय स्तरावर प्रलंबित आहेत.महाविद्यालयाच्या प्राचार्यानी अद्यापपर्यंत अर्जाची पडताळणी करून सहाय्यक आयुक्त,समाज कल्याण या कार्यालयाकडे सादर केले नाहीत.
जिल्ह्यातील सर्व प्राचार्यानी सन २०२४-२५ करिता आपल्या महाविद्यालयाच्या लॉगिनवर प्रलंबित असलेले अनुसूचित जाती प्रवर्गाच्या विद्यार्थ्यांचे भारत सरकार शिष्यवृत्तीचे पात्र अर्ज मंजुरीकरीता तात्काळ कार्यालयाकडे सादर करावे.ज्या अर्जामध्ये त्रुटी असतील असे अर्ज त्रुटी पुर्तता करुनच कार्यालयाकडे मंजुरीसाठी करावेत.आपल्या महाविद्यालयाच्या लॉगिनला एकही अर्ज प्रलंबित राहणार नाही.याची दक्षता घ्यावी.तसेच ज्या महाविद्यालयातील विद्यार्थ्यांनी अद्यापपर्यंत शिष्यवृत्ती अर्ज भरलेले नाहीत,अशा विद्यार्थ्यांना अर्ज भरण्याकरिता महाविद्यालय स्तरावरून सूचित करण्यात यावे.असे आवाहन समाज कल्याण विभागाचे सहाय्यक आयुक्त बाबासाहेब अरवत यांनी केले आहे.